K’izaho ve?

Roa taona lasa izay no nanoratako ity tononkalo ity. Toa mifanandrify indrindra amin’ny zavatra miseho amin’izao fotoana anefa ny votoatiny. Misaotra betsaka indrindra an’i Endrika01 nametraka fanamarihana tao anatin’ny vohikalan’ny Serasera.org izay nametrahako azy tamin’izany roa taona lasa izany, izay arahabaina ihany koa nahatratra ny tsingeringerina faha-folo nijoroan’ny vohikala.

Indro averiko etoana kosa izy ho vetsovetso iraisako aminao, ho tandindon’ny lasako, ary ho fanosisako sahady ny hoavintsika rehetra.

k’zaho ve? – Avylavitra

Mpanoratra : Avylavitra
Nampiditra : avylavitra
Date: 20/08/2007

K’zaho ve?

Nijery aho dia nahita
f’ireo be sandry sy be fikafika
dia miezaka hatrany hamotika antsika

Dia nijery aho, mbola nahita
f’ireo be hatoka mpangoron-karena
manindry tsy miato ‘zay te hiavo-tena

dia mbola nijery aho fa tsy nahita
na iray aza tamintsika
sahy hitsangana sy mba hiteny
hamaky bantsilana ny toy ireny

k’zaho ve?
‘zaho no antenaina hitarika foana?
‘zaho no atosika ho eny anoloana?

ny vavako ny ahy no haiko ampiasaina
k’aleoko mijanona ho mpanolotsaina
tsy eken’ny saiko ny hoe latsak’aina
ho an’ny maro…tsy mahay mifangaro.

Hijerijery aho ary enga hahita
fa mbola hitambatra ihany ‘reto isika.
Am’zay aho angamba ho sahy hitanty
na hamoy aina mihitsy ho faty
sy ho latsak’aina
ho an’ny maro… lasa nifangaro.

Avylavitra
(07 jolay 2007 06h 54 mn AM)

Atolotra manokana ho an’ireo zatra miravaka ny vangim-boay matin’ny sasany

Ilay DADA

ILAY      DADA

Objet : Atolotra ny ray malagasy rehetra isan-tokantrano

Ilay tokana eto an-tany
Mpizara hanihany
Mpizara sangisangy
Mpizara tambitamby

Ilay andrin’ny ankohonana
Mpanome fiononana
Raha sendra hakiviana
Raha tojo fahoriana

Ilay tsikim-pifaliana
Mpitondra hamamiana
Ho an’ny fianakaviana
Tia sady tiana

Ilay hery fiarovana
Tsy mahay torovana
Mpisedra sy mpiaritra
Ilay fiainana adi-sarotra

Ilay arahabaina androany
Satria ny eran-tany
Dia miara-miombom-bavaka
Ho anao miavaka

Nosoratan’i Raozigazy ho an’i Ray Malagasy rehetra manerana ny tany

http://www.facebook.com/l/;http://vetso.serasera.org/tononkalo/raozy/ilay-dada

Vesto.serasera.org

Maro ny takelaka azo tsidihana ao amin’ny vohikalan’ny SERASERA.ORG, fa notsongaiko manokana ny VETSO.SERASERA.ORG. Sehatra iray ifanenan’ny kanto Malagasy sy ny mpankafy azy izy io. Tsy natao ho an’ny matihanina irery anefa ny fandraisana anjara ao, fa na ianao mamaky ity hafatra ity aza dia afaka mametraka izay vetsovetsom-po na aingam-panahy sendra nandalo taminao ka noraiketinao an-tsoratra. Iza no mahalala, mety ho izay soratra kely napetrakao izay no hitondra anao ho amin’ny sehatra avo atsy aoriana.

Manerana ny vazan-tany rehetra no nipoiran’ny kanto voarakitra ao amin’ny VETSO.SERASERA.ORG, ary maroloko sy tsy mialonjafy ihany koa.

Isan’ireo nametraka ny kanto avy aminy i Raozigasy, ary tena nitondra fofona namerovero tonga hatraty anaty fo sy fanahiko koa, ka dia zaraiko aminao.

Manentana anao aho mba handalo kely amin’izany takelaka izany, na dia ho minitra vitsy monja aza fa tsy hanenenanao ny mahalala fa hay marobe ny Malagasy no mànana talenta, ary marobe ny Malagasy no mbola mitàna tsara ny fomba fanoratra sy ny tsipelina nolovainy.

Indro ary atolotra anao izay vokatry ny tany entin’i Raozigasy:

=========> ZARAO ETO

Zarao eto ny alahelo nokotrehim-po voadona
Zarao eto ny hadisoana rehefa iny ianao nifona
Zarao eto ny hatezerana, sy ireo otri-balifaty
Dia hihamaivana ianao, raha mivoaka ireo tsy tanty

Zarao eto ny hafaliana, mampitsiky izany tava
Zarao eto ilay fitia, mampisioka izany vava
Zarao eto izany vetso sy embonembona fitia
Dia ho faly ny tontolo, ka an-tsiky no miria

Zarao eto ny hetaheta, ao anatinao mangina
Zarao eto izany nofy, sy hasambarana ho zina
Zarao eto ireo kinasa, novetsoina hotanteraka
Dia hisinda avokoa ireo asa saina izay mandreraka

Zarao eto ireo fijery, sy fahitanao ny tontolo,
Zarao eto na dia hevitra, heverinao fa hoe bontolo
Zarao eto ny fisaina, fibanjinanao ny ho avy
Dia hivadika traik’efa, lesona ho an’ny mpianakavy

Zarao eto ireo kanto, nataonao tsiambararoa
Zarao eto ireo talenta, ho soratra sy masoivoho
Zarao eto ireo fahaizana, izay harenanao miafina
Mba ho kanto malagasy, irin’ny sasany ho tahafina

( http://vetso.serasera.org/news/raozigasy )

Isaorana manokana i Raozigasy tamin’ny namelany ny hametrahana ny asa sorany teto.

NENY Ô !

Matahotra ny tsy ho tafiditra eto intsony alohan’ny fetin’ny Reny aho, ka dia alefako sahady dieny izao ny FIRARIAN-TSOA ho anareo VEHIVAVY rehetra mamaky ity hafatra ity. Tsy àry ny olona raha tsy nisy anareo, tsy re ny tomany raha tsy teo ianareo, feno ny tany noho ianareo. SOA SESEHENA noho izany no noraisina koa indro misy tononkira (miala tsiny fa tsy haiko izay tompony, mba ampio aho)  iray hanampiako izay voalaza.
Andriamanitra anie hitahy ny VEHIVAVY REHETRA TSARA SITRA-PO.

Neny ô
Ianao no fahazavana, nanafosafo sy nihantàna,
Masoandro nahitako ny tontolo,
Nandrotsy, nitaiza sy nikolo.

Ianao no andry nijoroako,
nandritry ny fotoam-pahazazako.
Nibaby sy nitrotro sy nanondrotra.
Ianao tsy nikely soroka.

Fiverenana:
Fisaorana ry Neny no atolotro anao
Isaorana ireny soa vitanao

Neny ô!
Ny fiainako rehetra
Ho anao, ho anao tsy misy fetra,
Atolotro anao ry Nolalaiko
N’inon’inona, eny na ny aiko

Ho tratry ny taona maro mitsingerina indray e!
Saiky homeko teto ny hira misy feony amin’io fa tsy misy fampidirana MP3 tato.

FAHATSIAROVANA

Fahatsiarovana

60 taona no lasa
ka avia ary dia mba tsahivo
tamin’zany no kila sy may
‘lay lapan’Antananarivo

Ory ny fon’ny vahoaka
nahita ireo dona-tsetroka.
Any anatiny mangorohoro
te-hitroatra ary koa sempontsempotra.

Vetsovetson’ny fo tamin’izany,
ny sisa mba reko tety
hoe rahoviana vao mba hisy indray
ny ho solon’ity lapa ity?

Kinanjo fe ankehitrirny
tsy nisy izay nanelingelina
nijoro ilay Andrin’Iarivo
nitsangana ilay RAJOELINA.

Nampian’ireo mpanolotsaina
mitafy ny fanantenàna
hanorina iray vaovao
ho lapan’izato tanana.

Dia lapan’ny tanàna mijoro,
voakaly sy manara-penitra,
manaraka ny toetr’andro
no tsara tarehy sady mendrika.

Ny asa rehetra avy eo
dia ho fanasoavam-bahoaka
mitana ny marina hatrany
ho lavitr’izay ampamoaka.

Dia lapan-tanàna hanehoana
ny marina miharihary
ka ny fomba fiasa himasoana
dia ny asa fa tsy mba kabary.

‘ty toerana hasiana azy indray
no aoka hasiam-pitenenana
fa tena kianja mitandro
an’ilay fandriam-pahalemana.

Tsy kianjan’ny ramatahora
na fidinana an-dalambe,
fa kianjan’ny fifankatiavana
ary izany no hatao rehareha.

Dia kianjan’ny firaisankina
ekena tsy misy fandàvana
satria Malagasy miray
tsy misy mifanavangavana.

Ka raha 13′ny mey
no lavenona ilay teo aloha
dia ny 17′ny mey
no hajoro eto ilay faharoa.

Ka ny dinan’ny mpifankatia
no dina hifanaovana anio,
tsy ho fihatsaram-belatsihy
fa ekena amin’ny fo madio.

Ny tanjona hany tratrarina,
no sady hiaraha-mitazana,
dia ny hasin’Antananarivo
renivohitr’ity tanindrazana.

Andriamanitra Ray ao ambony
anie hitahy an’ity fikasàna
hamita ary koa hampijoro
ny lapan’izato tanàna

Nosoratan’i RADO (georges ANDRIAMANANTENA), ary novakiana imasom-bahoaka teo amin’ny kianjan’ny 13 mey nandritra ny fametrahana tamin’ny fomba ofisialy ny vatofehizoron’ny Lapan’ny Tanànan’Antananarivo hajoro manombokoa ny ampitson’io, mba ho solon’ilay efa may, 36 lasa izay

SAOBAKAKA SY TSINDRETRA

“Tsotsam-paika ka matim-bela”

Omaly, fa tsy ela :

‘Bakaka sy ‘Ndretra nikatroka vela !

Nafàna ny paika

Fa samy tsy maika !

Harefo sy herana sy ny zozoro :

Tsy nisy nanoro !

Jambena Ibakaka

Ka niala ny laka :

Nofoinan”Indretra

Ka tora-mitoetra !

Ny toho sy trondro  dia indray nisahotaka,

Indray nitanaka toa mamon’ny fotaka :

Tsy sahy nijery,

Fa voa ny mahery !

Ranito ny saina, rankizy malala,

Fa dia mahamenatra ny “be adala !”

Nofoinana : natao tapi-dàlana, tsy afa-mikofoka intsony. Maty ny fanorona rehefa izay no izy.

ILAY SOKATRA SY NY TANALAHY

“Roa lahy miditra ala, ka izy tokiko, ary izaho tanjany”

Raha ianao no mino, fa io mpanompo sampy:

Mpiara-monina, e, dia aoka hifanampy !

Tany Sandranavy, vohitra any Ibara,

‘Zao no tafasiry efa reko tsara:

Nisy, hono, sokatra antitra sy jamba

(Biby hafahafa, toa karaza-mamba ? ):

Niakatra an-tanety, nidina ao an-kona:

Kibo noana lava, loha koa voadona !

Heriny: namitsaka eo ambody hazo,

Toy ny mpivahiny latsaky ny tazo.

Ary nisy tanalahy nanantsafa:

“Zovy ? biby ? vato ?” – “‘Zaho fa tsy hafa!”

- “Iza?” – “Sokatra antitra efa poaka!”

- “‘Zany gadralava tsy afaka mivoaka?”

- “Ory foana! maty lava ! mahonena !”

- “‘Tesa anie aho!” – “‘Zao no hevitro razandry:

Mbola henjana ny tongotro sy sandry !

Aoka hiaraka fa samy ratsy bika !

Fikambanana no mahasoa antsika.

Ary izaho: tongotra, ianao ho maso,

Ka tazàno tsara izay manao an-kaso !”

- “Eny, hoy ny tàna, raha misy hàza :

Hiara-misalahy, fa izaho no hilàza !”

‘Zay no velirano! Oainy, fa niantsampy !

Mpiara-monina, ô ! mahaiza mifanampy !

“Tesa anie aho” -”Matesa anie, aho !” Fitenin’ny reny mangoraka ny zanany naratra na marary … “‘Tesa anie aho, sombin’aiko !”

ILAY SOKINA

“Niala tao Ankatso ka eo Ambohidempona”

Teo amoron-drano, ‘ndray mandeha,

Nisy sokina nirehareha.

‘Zay valala sendra mba nandalo

Lany ripak’itsy fahavalo.

Kanjo, tampoka, injay feo !

Taitra Isokina ka lasa teo.

‘Njay ny feo!… akaiky!… feon’alika…

Aiza no nilefa ihavantsika ?

Indro, lavaka mitanatàna !

Niditra izy, sempotra sy àna !

Nefa loza? – “Dadako, mangidy!”

‘Njany tandramokotra mihidy !

Ketoka ny loha manontolo,

Ka nitsanga-menatra ny volo !

Loza nilefàna; loza hita!..

Vetivety foana: maty ! vita !

Drakaka madonda efa liana

No nitsentitra amim-pifaliana !

To’izany, mantsy, ny eto an-tany:

‘Zay manimba mbola hitomany !

Drakaka. Karazam-poza vaventy, somary volomparasy manjamanja, monina eny amoron’ony, akaikin’ny vinany, fa tsy dia hatrany an-dohany tsy akory.Tsy fihinan’ny Antemoro izy io, nefa toa ankafizin’ny Antesaka.

GISA SY DOKOTRA

Indray fahavaratra: tonga ny rano!

Dia faly ny dokotra samy lomano!

Kanefa nanatona ity gisalahy:

Nanao am-bozizy, nanao sahisahy!

Voakapony mafy ity dokotra kely:

Dia taitra ny rainy, ka saiky hamely!

Fa tamy nanatona kosa ny maro,

Ka sady nananatra an’itsy no niaro:

Nanao toho-tsofina, velon-korana:

“Raha izao no mipaka, dia ady mafana!

Isika handresy, fa “be noho vitsy”

Kanefa ny mety, dia “aoka mihitsy!”

Mandefitra aloha no mety amintsika,

Fa izay feno avona mbola hihika!”

Dia lasa ny dokotra nanahy lamba.

Kinanjo Ragisa voapaokan’ny mamba!

Nanoja ny rano! Voadona ny herana!

Ka izao no fiteniny reko niserana:

“Toneo mba halemy ny fahatezerana,

Fa tsara miafara ny tia fandeferana!”

Laferana: Tokony ho “leferana“, avy amin’ny lefitra, milefitra, ileferana.

AMALONA SY SAHONA

AMALONA SY SAHONA

“Matin-kanin-kely toa amalona”

Indray takariva nandrahona :

Taitra ity sahona,

Fa tana-mangeja, farango mandratra

Namely ny tratra!

Dia nandro tsy fidiny tao an-kamory;

Nandao ny sakaiza niaraha-nivory

Ka very ny tory!

Amalo-masiaka no mba mihantàna:

“Vonjeo aho, Dada, fa ngoly sy àna!”

- Mangina fa remby! -  Nandrapaka izy

Kanefa voafintana mora, rankizy

Izay no tantara mba tian-ko lazaina ;

‘Zay hendry, misaina!