KEPOKA ( nosoratan’i RAOZIGASY)

Kepoka

Kepoky ny kapoka fa voakipaka mantsy
Ilay tovovavy kevoka voakopaky ny fantsy
Nakopaky ny tiany, toy ny kapo-kapa
Ka kepaka, nikipaka sy nipapapapa

Nanantena loatra fa ny hatanorany
No zahatra hahatafita azy eto an-tany
Tsy hainy anefa fa : izay no tena fitaka
Tsy azo entin-doatra hoe mibitabitaka

Nikoropaka, nikaroka, fika an’herikerika
Fa nampikorapadrapaka, ilay jejon’ito derika
Kepoky ny nenina, satria nimokamoka
Taitran’ny sodoka ka tonga dia bevohoka

Niantehitra, natoky ity seran’hatsarana
Ka nisolifatra, nasosany, fa nihanahana
Ny tantely raha afa-drakotra ny tranony ka vaky
Dia poa toy izay ange ny trosa-tany dia mitaky

Kaokan-teny am-bakiraoka,sy kiakam-baraka
Sisa nasetry ireto kiana sy latsan-kakakaka
Kohaka mangina, mikomy hoe « ekeko »
Nihohoka niaiky fa hoe koka … sisa reko

Raozigasy © 29/03/2017

Publicités

DADA (tononkalon’i Barry Sirjon)

Arahaba nahatratra ny fetin'ny Ray  -2015

Arahaba nahatratra ny fetin’ny Ray -2015

Na dada foana aza:
ny mpamono vady sy ny mamolava
ary ny mpanitsakitsaka
Moa mendrika azy ihany va?…ny telina sy sitraka
…Satria hoe loharano nipoirana, nitondra tsimok’aina
Ka na dia manahirana, na dia mampiferinaina
Dia lolohavina sy bataina?
…Asanao ny anao…fa io moa dadanao!

Fa amiko ny dada dia masoandro sady volana
kintana mamiratra raha sendra ady sy olana
Loham-pianakaviana tsy miamboho adidy
Tsy malailay fonosana, na andevozin’ny hidihidyKanefa moa ny olombelona tsy misy tonga lafatra
Saingy ny tena dada miezaka mamantatra
ny akora sy kojakoja ilain’ny vady aman-janany:
Laniany ao ny ron-doha sy mondron-kery ananany

Ka raha tsy manakaiky izay ilay dadanao dia atoroy
fandrao dia làkana zozoro no mbola ratsy fivoy
Fa raha renao am-po: ilay fitiavany sarobidy sy matoy
alohan’ny andehanany hiasa dia fihino izy, ary orohy!

Ary ho an’ireo izay tsy manana dada intsony kosa
Aza alàna ao an-tsaina mihitsy ilay fitiavany miavosa
Na tsy eo aza ny vatany, tsy re ny doboky ny fony
…Ny fahatsiarovana azy : aza avela, aza afoy!

Barry Sirjon

Barry Sirjon  (20-06-2015)

Ato kosa jerena raha hijery tononkalo momba ny Arendrina ianao

Ny Aza Voany (#Dafy_Noely)

NY AZA VOANY

Bika mafonja
Sy zipo manonja
Dia ampy nampientana ity tovolahy.
Ka roso nanaraka
Ny ivy efa raraka
Te-hampiresaka nefa tsy sahy.

Ny maso amin’izany,
Tsy ambony fa ambany,
Mandinika foana ny onjam-balahany,
Mahasondriana
Sy mahavariana,
Mba tiany ho antsoina fa mbola tsy sahiny.

« Andraso aho akia ! »,
Dia maika ery,
Hanomboka resaka abobo matavy,
Saingy nierika kely
Ilay Madimoazely :
Loza ka loza fa hay sarimbavy !!!!!!!!!!!

Dafy Noely 23/10/2014

Harena sy Fananana

Harena sy Fananana

 

Io ilay zanakay, manosika kodiarana,
tsy hitany akory aho, efa eo am-baravarana
fa ny kilalao eny aminy sy ny teny ireriny,
no arosony, ahemony, sady averimberiny

kanjo vao , naheno, ilay hidy varavarako
nibitaka, nifaly, niantso ny anarako
natsipiny daholo, ny rehetra teny an-tanany
ka avy dia niantsampy, ny sandriko niondanany

avy eo dia mamikitra, miakatra eo an-tsoroka
sady feno sangy, no totofako oroka
manomboka miresaka, mibada teny gasy
ilay efa-taona keliko, zanaka Raozigasy

io fa be tantara, ny tany am-pianarana,
hendry be any androany, tsy nisy hifandaharana
dia nilalao baolina, tany an-tokontany
dia avy eo dia nianjera fa tsy nitomany

i neny koa io, manaraka ao aoriana
miandry anjara oroka, sao dada dia variana
sady manondro molotra, ilay zanakay trotroiko
no tsy aritro ihany koa, ka ny volony safoiko

dia indreo izahay, mifamihimpihina
tototra fitiavana, tsy taka-pandinihina
faly, ravo, mirana, feno fiadanana
fitiavana ny anay, no harena sy fananana

Raozigasy Tononkalo

Ialahy tsy Malagasy intsony

Ialahy tsy Malagasy intsony

 

IALAKO TSINY KELY ALOHA
HO AN IZAY MAHATSIARO VOA
FA NY AHY NATAO HAMPISAINA
INDRAINDRAY KOA IZANY MBA ILAINA

Ialahy tsy Malagasy intsony

Izaho ilay mihinan-kodi-kena, sy voatavo andro alahady
Izaho ilay mpisotro « diromel » dia avy eo mamono vady
Izaho ilay mitrongy anio, vao mandrapaka ny omaly
Izaho ilay boto irakirak’ialahy rehefa mifaly

Izaho no tena Malagasy

Izaho ilay mitera-bitro, mivovo anaty trano daba
Izaho ilay mitatitr’entana, miloloha gony sy garaba
Izaho ilay tsy mahay manoratra, taranaky ny voambaka,
Izaho ilay monina any ambany, ilay be mpisam manjaka

Izaho no tena Malagasy

Izahay ilay be fianakams, tena bobaka an’isa
Izahay ilay mahantra, efa maro an-tapitrisa
Izahay ilay voavidy, rehefa misy fifidianana
Izahay raha miasa tsara, lasa mba mivarotra anana

Izahay no tena Malagasy

fa ialahy be resaka io, milaza tia ny firenena
ialahy milaza ho avara-pi, ilay any an-dafy no miantsena
ialahy mikata am-palitao, sy mikenda rehefa miasa
ilay manompa an-tenin-gozo, rehefa manitsaka mpiasa

Ialahy tsy Malagasy intsony

f’ialahy mitsoaka any an-dafy, rehefa vizana ny eto
ialahy misotro « whisky » raha sendra ady mampisento
ialahy miketrika « devise », rehefa potika ny bizina
ialahy anaty 4×4, no migobs raha dizina

Ialahy tsy Malagasy intsony

Tsy Malagasy intsony ialahy, fa sisan-tsafiotran’ny vazaha
Tsy Malagasy intsony ialahy, ilay mipitsika, mipà
Tsy Malagasy intsony ialahy, tsy miray lentika amin’ny sambo
Tsy Malagasy intsony ialahy rehefa mitsatsaka ny atambo

Raha tena Malagasy ialahy, izahay aloha jerena
Raha tena Malagasy ialahy, ilaozy ilay fitiavan-tena
Raha tena Malagasy ialahy, izahay leitsy mba vonjeo
Raha tena Malagasy ialahy, izahay madinika jereo

Raozigasy Tononkalo

Inoako

Inoako

Inoako fa misy tokoa ny fanahy
azo ianteherana tsisy ahiahy ,
tsy mba mivadika teny nekena,
tsy mampanjaka ny fitiavan-tena.

Inoako fa misy ny fo tena tia,
te-hifanohana sy hiara-dia,
hifampizara ny soa sy ny sarotra,
mandala fihavanana alohan’ny varotra.

Inoako fa misy ny tena sakaiza
tsy mba manary na ho aiza na ho aiza,
tsy mba mijery izay harina an-tava,
manitsy ny diso, manolo ny rava.

Inoako fa misy firahalahiana
ankoatra sy ivelan’ny fianakaviana,
fifankatiavana latsaka anaty,
tsy ravan’ny taona fa toa fatomaty.

Na sendra hakiviana aza aho androany,
inoako fa misy izany olona izany !
Tsy vao hotadiaviko fa efa ao,
inoako izay olona izay fa ianao.

Ianao ilay namana nitari-dalana,
ianao ilay sakaiza tsy manary havana,
ianao ilay nanokatra fo sy fanahy ,
ary tena inoako fa hitantana ahy …

Fara Mananjandry
Barakani-Mayotte, alarobia 1 aprily 2004

inoako_FaraMananjandry

IANAO NAMAKO

IANAO NAMAKO

*************

Ny namako namako foana

namako mandavan-taona

tsy namana toy ny paoma

ka kepohina rehefa noana

fa namana iray mifanohana

manarina raha tafintohina

  mampitraka raha lavo mianjera

mahatanty mandray ny tsikera

mahay izay ekeko sy laviko

manjohy amin’izay diaviko

mananatra raha misy tsy mety

tezitra fa vetivety

tsy mamingana an-dàlan’hombana

tsy mitarika hanao hadalàna

mifampizara ireo hafaliako

manamaivana ny fijaliako

mitovy tigetra kendrena

mitovy fijery amin-tena

fizaràko ny soa sy ny mamy

izay ilay namako raha mbola eto an-tany

Ny any an-danitra mbola tsy haiko

fa ny eto aloha izao no lalaiko

 

Avylavitra 29/03/2012 08h 50 Ambatomitsangana

%d blogueurs aiment cette page :